Vérsica ye una obra multidisciplinar qu'axunta lliteratura, música y diseñu artísticu.

 Entama na base d'un cuentu escritu por Gonzalo Pumares y producíu por Marcos Álvarez (Cerezal). Un cuentu que trescurre al traviés de diez cortes musicales y nel que cada ún d’esos diez cortes 

ye un poema que, de dalguna mena, esplica una parte de la hestoria del protagonista del cuentu: un vieyu que yera mozu.    

 

 

La Música: Del Folk al Refundiu del Rock 

 

La obra, qu'entama dende una idea ecléctica, xune no musical ellementos acústicos del folk nel mesmu planu que la riqueza sonora del rock y pop d'anguaño.

Na grabación del discu, participen artistes venceyáos a mui dixebráes estayes dientro de la música d’Asturies.

 Amás de los nomáos Marcos Álvarez y Gonzalo Pumares, andechen n’esta obra Juan Yagüe, Álvaro Bárcena, Juan Carlos Vega, Sergio Rodríguez, Wilón DeCalle y Juanjo Díaz, 

tando les voces nes manes de Ana Belén Rodríguez, Esther Yuste, Isa R. Infiesta y Andrea Álvarez, que fói la primera voz de Cerezal. 

La narración del cuentu fízola una neña de 6 años.  

 

  Narrativa y Poesía

 

 Con poemes d’autores consolidáos d’anguaño, como Miguel Monteavaro, Xurde Fernández o Vanessa Gutiérrez, d’autores de la “Segunda Xeneración” y con obra principalmente nos últimos años del sieglu XX (Xabiero Cayarga, Taresa Lorences), o con testos de los primeros años venti (Nené Losada, Fernán Coronas).

Na esbilla de los poemes tuviéronse mui en cuenta los sentimientos del protagonista, como la soledá, l’abandonu, el mieu o la perda, pero tamién l’amor a la tierra, la conexión cola naturaleza y la felicidá. 

 

Diseñu Artísticu y Edición Llimitada 

 

Na mano, Vérsica ye un cuentu infantil, un discu, una escultura. Los diseños de Miguel G. Díaz dan-i a la obra un envoltoriu únicu, siendo esta primer edición nun formatu nunca fechu enantes dientro de la música d’Asturies. 

Tal asina ye, que los responsables del proyeutu escoyeron sacar al mercáu namái una edición llimitada de 250 uds, les cuáles van numeráes, lo que-i da a la obra’l carauter d’única con esta presentación.  Ya tá disponible na plataforma  Bandcamp de Versica.